وزیر اعلیٰ گلگت بلتستان حاجی گلبر خان نے پارلیمانی امن کمیٹی اور علمائے کرام سے گفتگو کرتے ہوئے کہا کہ امن ہم سب کی ضرورت ہے۔ امیر تنظیم اہلسنت والجماعت گلگت بلتستان وکوہستان قاضی نثار احمد پر دہشت گردوں کی جانب سے قاتلانہ حملے کے بعد امن و امان اور بھائی چارگی کی فضاء کو برقرار رکھنے میں علمائے کرام اور سول سوسائٹی نے جو کردار ادا کیا وہ قابل تحسین ہے۔وزیر اعلیٰ نے کہا کہ قاضی نثار احمد نے اپنے اوپر ہونے والے قاتلانہ حملے کے بعد بھی صبر اور امن کا درس دیاجس کی وجہ سے دہشت گردوں کے عزائم ناکام ہوئے۔ مولانا قاضی نثار احمد پر ہونے والے قاتلانہ حملے کی تمام مسالک اور طبقوں نے یک زبان ہوکر مذمت کی جو گلگت بلتستان میں مستقل قیام امن کیلئے خوش آئند ہے۔ دہشت گردی کے اس واقعے میں ملوث تمام اصل مجرموں کو کیفر کردار تک ہر صورت پہنچائیں گے۔ قانون نافذ کرنے والے ادارے اور پولیس تمام دہشت گردوں کی گرفتاری کیلئے کام کررہے ہیں۔ وزیر اعلیٰ نے کہاکہ سوشل میڈیا پر منافرت پھیلانے والوں کیخلاف بلاتفریق ایف آئی آر کئے جارہے ہیں اور تمام کو گرفتار کیا جائے گا۔
