اے آئی جیو نیویگیٹراور کے آئی یو کے مابین معاہدہ ،دونوں ادارے طلبہ کو جدید ٹیکنالوجیز میں تربیت،انٹرنشپ کے مواقع او ر مشترکہ تحقیقی منصوبوں پر کام کریں گے

قراقرم انٹرنیشنل یونیورسٹی اور اے آئی جیو نیویگیٹر نے طلبہ کی صلاحیتوں کو بڑھانے اور مشترکہ تحقیقی منصوبوں کے حصول کے لیے باہمی تعاون کے سمجھوتے پر دستخط کرلئے۔ باہمی تعاون کے سمجھوتے پر یونیورسٹی کے وائس چانسلر پروفیسر ڈاکٹر عطاء اللہ شاہ اور اے آئی جیو نیویگیٹرکے سی ای او عاصم جاوید نے دستخط کئے۔باہمی تعاون پر دستخط کے حوالے سے منعقدہ تقریب میں جامعہ اور اے آئی جیو نیگیٹرز کے ذمہ داران بھی موجود تھے۔اس تعاون کا مقصد طلبہ کو جدید ٹیکنالوجیز میں تربیت اور رہنمائی،انٹرنشپ اور مشترکہ تحقیقی منصوبوں پر کام کرنا ہے۔ ای آئی جیو نیویگیٹر اپنی جیو اسپیشل مصنوعی ذہانت (GeoAI) اور ایڈوانسڈ ڈیٹا اینالٹکس کی مہارت کو بروئے کار لا کر جامعہ قراقرم کے طلبہ کی تکنیکی صلاحیتوں کو نکھارے گی۔یہ شراکت داری طلبہ کو موسمیاتی تبدیلی، وسائل کے انتظام اور پائیدار ترقی جیسے عصری چیلنجز سے نمٹنے کے لیے تیار کرے گی جو پاکستان کے شمالی پہاڑی علاقوں کے تناظر میں خصوصی اہمیت رکھتے ہیں۔تقریب میں اظہار خیال کرتے ہوئے وائس چانسلر کے آئی یو پروفیسر ڈاکٹر عطاء اللہ شاہ نے کہا کہ ای آئی جیو نیویگیٹر کے ساتھ یہ تعاون ہمارے طلبہ کو جدید ٹیکنالوجیز سے استفادہ کرنے اور پائیدار ترقی میں کردار ادا کرنے کے مواقع فراہم کرے گا۔انہوں نے مزید کہا کہ یہ شراکت داری یونیورسٹی کی تحقیقی صلاحیتوں کو مضبوط کرے گی اور طلبہ کو اعلیٰ معیار کے منصوبوں میں عملی تجربہ فراہم کرے گی جبکہ سی ای او اے آئی جیو نیویگیٹر عاصم جاوید نے کہاکہ کے آئی یو کا منفرد جغرافیائی محل وقوع اور معیاری تعلیم کے لیے عزم ہمارے جیو اے آئی جیو کے مشن سے ہم آہنگ ہے، ہم طلبہ کی ہنرمندی کو پروان چڑھانے اور حقیقی دنیا کے مسائل کے حل کے لیے مشترکہ منصوبوں پر کام کرنے کے منتظر ہیں۔