جو یو اے ای اور سری لنکا میں نہ ہوسکا وہ آج ہو گیا پاک بھارت ٹاکرے میں روایتی حریفوں نے ہاتھ ملا لیا۔پاکستان اور بھارت میں حالیہ شدید کشیدگی نے کھیل کے میدان کو بھی سیاست سے آلودہ کر دیا اور بھارتی کھلاڑیوں نے اسپورٹس مین اسپرٹ کی خلاف ورزیاں کرتے ہوئے کھیل کی روح کے منافی کئی اقدام کیے۔
گزشتہ ماہ یو اے ای میں کھیلے گئے ایشیا کپ میں تین بار پاک بھارت ٹاکرا ہوا۔ راؤنڈ میچ کے بعد سپر فور اور پھر فائنل میں روایتی حریف مدمقابل آئے۔ تاہم تینوں بار بھارتی کپتان اور کھلاڑیوں نے پاکستانی کرکٹرز سے ہاتھ نہیں ملایا اور 150 سالہ کرکٹ تاریخ میں یہ حرکت پہلی بار کی گئی۔نہ صرف دنیائے کرکٹ بلکہ دیگر فورمز پر بھی بھارتی کھلاڑیوں کی اس شرمناک حرکت کی مذمت کی گئی اور ان کے ملک میں اس کے خلاف آوازیں اٹھائی گئیں۔
تاہم عالمی رسوائی کے باوجود مودی سرکار اپنے اوچھے ہتھکنڈوں سے باز نہ آئی اور ویمنز ورلڈ کپ میں کولمبو میں کھیلے گئے میچ میں بھی انڈین ویمنز کھلاڑیوں نے اسی روش کو دہرایا۔تاہم بھارت کا غرور خاک میں ملا اور آج بالآخر ملائیشیا میں کھیلے جا رہے سلطان آف جوہر ہاکی کپ میں پاکستان اور بھارت کی ٹیمیں مدمقابل آئیں۔ میچ تو تین، تین گول سے برابر ہو گیا۔ لیکن میچ سے قبل دونوں ممالک کے کھلاڑیوں نے ہاتھ ملا کر وہاں موجود شائقین کھیل کے دل جیت لیے۔
میچ کے آغاز سے قبل دونوں ٹیموں کے کھلاڑیوں نے ہاکی کے کھیل کی روایت کے مطابق ایک دوسرے کی ہتھیلی سے ہتھیلی مار کر مصافحہ کیا۔دوسری جانب میچ تین تین سے برابر رہا۔ پاکستان کی جانب سے سفیان خان نے 2 اور حنان شاہد نے ایک گول کیا۔
