ڈی پی او گلگت کی اشتہاری اور منشیات فروشوں کے خلاف کارروائیاں تیز کرنے کی ہدایت

 ڈسٹرکٹ پولیس آفیسر گلگت اسحاق حسین (پی ایس پی) کی زیر صدارت اجلاس منعقد ہوا۔ اجلاس میں ایس ڈی پی او جگلوٹ سرکل سید کامران حسین، ایس ایچ اوز تھانہ جگلوٹ و تھانہ پڑی، تفتیشی افسران، محریران اور CMS/HRMIS آپریٹرز نے شرکت کی۔

اجلاس کے دوران سال 2024 تا 2025 کے زیر تفتیش مقدمات، تکمیلی چالان، مجرمان اشتہاری اور عدالتی مفروران کی گرفتاریوں کا تفصیلی جائزہ لیا گیا۔ڈی پی او گلگت نے تمام ایس ایچ اوز اور تفتیشی افسران کو ہدایت دی کہ مجرمان اشتہاری و عدالتی مفروران اور منشیات فروشوں کے خلاف کارروائیوں میں مزید تیزی لائی جائے اور تمام مقدمات میرٹ کی بنیاد پر نمٹائے جائیں۔انہوں نے واضح کیا کہ عوام کے جان و مال کا تحفظ اور مظلوم کو انصاف فراہم کرنا پولیس کی اولین ترجیح ہے، اور اس سلسلے میں کسی قسم کی کوتاہی برداشت نہیں کی جائے گی۔