گلگت میں دہشت گردی کے ممکنہ خطرات کے پیش نظر سکیورٹی کو ہائی الرٹ کر دیا گیا ہے۔ ترجمان گلگت بلتستان پولیس کے مطابق پولیس کی تنصیبات کو ممکنہ طور پر نشانہ بنایا جا سکتا ہے، جس کے باعث حفاظتی اقدامات مزید سخت کر دیے گئے ہیں۔پولیس کے مطابق تمام مذہبی مقامات، اہم سرکاری و حساس تنصیبات اور دیگر سکیورٹی اداروں کے دفاتر کی سکیورٹی بڑھا دی گئی ہے۔شہر کے مختلف داخلی و خارجی راستوں اور اہم مقامات پر ناکے قائم کر کے مشکوک افراد کی سخت چیکنگ اور تلاشی کا عمل جاری ہے۔ترجمان نے عوام سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک سرگرمی یا فرد کی فوری اطلاع پولیس کنٹرول روم کے ہیلپ لائن نمبر 15 پر دیں۔پولیس کا کہنا ہے کہ عوام کے تعاون سے ہی دہشت گردی جیسے خطرات کا مؤثر مقابلہ کیا جا سکتا ہے اور مل کر اس ناسور کو شکست دی جا سکتی ہے۔
