نیٹکو قومی ادارہ ،منافع بخش بنانے کے لیے حکومت ہر ممکن تعاون فراہم کرے گی، جسٹس (ر)یار محمد
نگران وزیر اعلی گلگت بلتستان جسٹس (ر)یار محمد نے کہا ہے کہ نیٹکو قومی ادارہ ہے ،منافع بخش بنانے کے لیے حکومت ہر ممکن تعاون فراہم کرے گی، موجودہ ایم ڈی نیٹکو سے توقعات وابستہ ہیں کہ وہ اس ادارے کو درست سمت میں گامزن کریں گے۔
ایم ڈی نیٹکو کی جانب سے دی جانے والی محکمانہ بریفنگ کے موقع پر گفتگو کرتے ہوئے نگران وزیر اعلی نے کہا کہ نیٹکو کو ایک منافع بخش ادارہ بنانے کے لیے سیاسی مداخلت کا خاتمہ، کفایت شعاری اور شفافیت کو یقینی بنانے کے لیے ضروری اصلاحات ناگزیر ہیں۔نیٹکو کے آپریشنز کو آن لائن اور ادارے کو ڈیجیٹلائزکرنے کے اقدام قابل ستائش ہے، جس سے احتساب اور شفافیت کو یقینی بنایا جا سکے گا۔نگران وزیر اعلی نے اس موقع پر ایم ڈی نیٹکو کو ادارے کی ورکشاپس کو اپ گریڈ کرنے اور دیگر اصلاحی اقدامات پر اطمینان کا اظہار کیا۔نگران وزیر اعلی نے کہا کہ مسافروں کی جانب سے دورانِ سفر بسوں کے خراب ہونے سے متعلق سوشل میڈیا پر شکایات موصول ہو رہی ہیں، جس کو مدنظر رکھتے ہوئے بسوں کی فٹنس اور بروقت دیکھ بھال کو ہر صورت یقینی بنایا جائے ۔
