پی سی بی نے نیاز اسٹیڈیم حیدرآباد میں پی ایس ایل میچز کرانے کا عندیہ دیدیا

پاکستان کرکٹ بورڈ (پی سی بی) نے حیدرآباد کے نیاز اسٹیڈیم میں پی ایس ایل سمیت انٹرنیشنل میچز کروانے کا عندیہ دے دیا ہے۔
پی سی بی کے ڈائریکٹر ڈومیسٹک خرم نیازی نے نیاز اسٹیڈیم حیدرآباد کا دورہ کیا، اس موقع پر اُن کا کہنا تھا کہ اسٹیڈیم کی حالت پہلے سے بہتر ہے، لائیٹس بھی لگ چکی ہیں۔رپورٹس کے مطابق ڈائریکٹر ڈومیسٹک پی سی بی نے کہا کہ میئر حیدرآباد نیاز اسٹیڈیم کو پی سی بی کے حوالے کرنے کا معاہدہ کریں تو اسٹیڈیم پر بین الاقوامی معیار کے مطابق کام شروع کردیا جائے گا۔

میئر حیدرآباد کاشف شورو کی جانب سے پاکستان کرکٹ بورڈ کو اسٹیڈیم کے حوالے کرنے کی یقین دہانی کروادی گئی ہے۔شائقین کرکٹ کے مطابق پی سی بی نیاز اسٹیڈیم کو بین الاقوامی معیار کے مطابق تیار کرکے کرکٹ کے دروازے کھول سکتی ہے، اس کے لیے محض سنجیدگی اور عملی اقدامات کی ضرورت ہے۔واضح رہے کہ نیاز اسٹیڈیم حیدرآباد کی اپنی ایک منفرد تاریخ ہے، اس اسٹیڈیم میں پاکستانی ٹیم ناقابل شکست رہی ہے۔ جنوری 2008 میں پاکستانی ٹیم نے زمبابوے کو شکست دے کر اپنا ریکارڈ برقرار برقرار رکھا تھا۔