بھارت میں آسٹریلوی ویمنز کرکٹرز سے دست درازی کے واقعے پر بھارتی وزیر کیلاش وجے ورگیا کا کہنا ہے کہ اس واقعے کی ذمہ داری خود آسٹریلین کرکٹرز پر عائد ہوتی ہے۔کیبنٹ منسٹر کیلاش وجے ورگیا نے اندور میں پیش آئے واقعے پر کہا ہے کہ آسٹریلوی ویمنز کرکٹرز کا بغیر اطلاع باہر جانا ان کی غلطی تھی، اس واقعے سے وہ سبق حاصل کر لیں گی اور مستقبل میں احتیاط سے کام لیں گی۔
سیکیورٹی کی ناکامی بھی تسلیم کرتے ہوئے بھارتی وزیر کیلاش وجے ورگیا نے کہا کہ آسٹریلوی ویمن کھلاڑیوں سے بدتمیزی کا واقعہ سیکیورٹی کی ناکامی بھی ہے۔کانگریس کی جانب سے کیلاش وجے ورگیا کے بیان کو بی جے پی کی سوچ قرار دیا گیا ہے۔کانگریس رہنما ارون یادیو کا ردعمل دیتے ہوئے کہنا تھا کہ کیلاش وجے ورگیا کا بیان ان کی سوچ کا عکاس ہے، ان کا بیان تو بتانے میں بھی گھناؤنا اور گھٹیا ہے۔ پورا ملک اس ہونے والے واقعے پر سرمشار ہے۔
دوسری جانب بھارتی کرکٹ بورڈ (بی سی سی آئی) نے اندور میں آسٹریلیا کی ویمن کرکٹ ٹیم کی دو کھلاڑیوں کے ساتھ ہوئے دست درازی کے واقعے پر ردعمل دیا ہے۔بھارتی کرکٹ بورڈ (بی سی سی آئی) جنسی ہراسانی کو افسوس ناک قرار دیتے ہوئے کہا ہے کہ اس واقعے سے بھارت کا تشخص مجروح ہوا ہے، بی سی سی آئی کے نائب صدر راجیو شکلا نے کہا کہ خواتین کرکٹرز کے تحفظ کے لیے تمام ضروری اقدامات یقینی بنائے جائیں گے۔
انہوں نے کہا کہ یہ پورا واقعہ انتہائی افسوس ناک ہے اور ہم اس کی مذمت کرتے ہیں، ہم تمام ضروری اقدامات کریں گے اور پولیس نے ملزم کو گرفتار کرلیا ہے۔بی سی سی آئی کے سیکریٹری دیوجیت سائیکیا نے بھی افسوس کا اظہار کیا اور ملزم کو فوری گرفتار کرنے پر مدھیا پردیش پولیس کی تعریف کی، انہوں نے کہا کہ یہ ایک انتہائی افسوس ناک واقعہ ہے۔
