کوہ پیمائی میں پاکستان کا پرچم بلند کرنے والے شہروز کاشف حکومتی انعام کے منتظر ہیں اور انہوںنے انعام نہ ملنے پر ملک سے ہجرت کرنے کی دھمکی دیدی ہے۔شہروز کاشف 8 ہزار میٹر بلند تمام 14 چوٹیاں سر کرنے والے پاکستان کے کم عمر ترین کوہ پیما ہیں۔
شہروز کاشف نے کہا کہ میری حکومت نے مجھے کیش پرائز دینے کا کئی مرتبہ وعدہ کیا لیکن سب بھول گئے، میں نے اپنی زمین اور گاڑی بیچی لیکن میں کوہ پیمائی کی وجہ سے اب مقروض ہوں۔انہوںنے کہاکہ ملک کا نام روشن کرنے کے لیے میرے لگ بھگ 4 کروڑ روپے لگے ہیں، میری کمر کا خطرناک آپریشن ہوا، میری کمر میں راڈز ہیں، مجھے اب چلنے پھرنے میں دشواری ہے۔شہروز کاشف نے کہا کہ میرے کسی نے میڈیکل کے بلز کی ذمہ داری تک نہیں اٹھائی، کوئی اس شخص کے ساتھ ایسا کیسے کرسکتا ہے جس نے 8 ہزار سے بلند 14 چوٹیاں سر کی ہیں۔انہوں نے مزید کہا کہ اگر ایسا ہی رویہ رہا تو میں پھر بیرون ملک اپنے لیے کچھ سوچنے پر مجبور ہوں گا۔
