گورنر گلگت بلتستان کا چیف کورٹ کے سینئر جج ملک عنایت الرحمن کی گاڑی پر فائرنگ کے واقعہ کا نوٹس
گورنر گلگت بلتستان سید مہدی شاہ نے چیف کورٹ کے سینئر جج ملک عنایت الرحمن کی گاڑی پر فائرنگ کے واقعہ کا سختی سے نوٹس لیتے ہوئے صوبائی سیکریٹری داخلہ، آئی جی گلگت بلتستان اور قانون نافذ کرنے والے اداروں کو ہدایت کی ہے کہ گلگت شہر میں سکیورٹی کے انتظامات مزید سخت کیے جائیں اور واقعے میں ملوث شرپسند عناصر کو بلا تفریق آہنی ہاتھوں سے کچلا جائے۔گورنر نے کہا کہ عدلیہ کے وقار اور امن و امان کو چیلنج کرنے والوں کو کسی صورت برداشت نہیں کیا جائے گا۔ انہوں نے قانون نافذ کرنے والے اداروں کو ہدایت دی کہ شہریوں کے جان و مال کے تحفظ کو یقینی بنانے کے لیے فوری اور مؤثر اقدامات کیے جائیں۔گورنر سید مہدی شاہ نے عوام سے اپیل کی کہ وہ اتحاد و اتفاق کا مظاہرہ کریں اور امن و امان کے قیام کے لیے قانون نافذ کرنے والے اداروں کے ساتھ بھرپور تعاون کریں تاکہ شرپسند عناصر کے ناپاک عزائم کو ناکام بنایا جا سکے۔
