سکردو کو ملک سے جوڑنے والی سڑک سیلاب میں بہہ گئی، پاک فوج کا ہنگامی مرمتی آپریشن جاری
گلگت بلتستان میں حالیہ شدید بارشوں اور سیلاب کے باعث سکردو کو ملک کے دیگر حصوں سے ملانے والی مرکزی شاہراہ استک کے مقام پر بہہ گئی۔ صورتِ حال کی سنگینی کو دیکھتے ہوئے آرمی چیف کی خصوصی ہدایات پر پاک فوج نے فوری طور پر ہنگامی بنیادوں پر سڑک کی بحالی کا کام شروع کر دیا ہے۔فوجی حکام کے مطابق اعلیٰ افسران کی براہِ راست نگرانی میں پاک فوج کے جوان جدید مشینری کی مدد سے دن رات بحالی کے کام میں مصروف ہیں۔خراب موسم، شدید پانی کے بہاؤ اور زمینی چیلنجز کے باوجود فوجی دستے عزم، جانفشانی اور جذبہ خدمت کے ساتھ سڑک کی مرمت کر رہے ہیں۔فوجی ذرائع کا کہنا ہے کہ تمام تر مشکلات کے باوجود کام کی رفتار کو برقرار رکھا جا رہا ہے اور جلد ہی سکردو کو دوبارہ ملک کے دیگر علاقوں سے زمینی راستے سے جوڑ دیا جائے گا۔سڑک کی بحالی نہ صرف عوام کی آمدورفت کی بحالی کے لیے اہم ہے بلکہ امدادی سامان کی بروقت ترسیل اور سیلاب زدہ علاقوں تک رسائی کے لیے بھی ناگزیر ہے۔علاقہ مکینوں اور مقامی انتظامیہ نے پاک فوج کے فوری ردعمل اور موثر کارروائی کو سراہا ہے اور اٴْمید ظاہر کی ہے کہ سڑک کی جلد تکمیل سے معمولات زندگی بحال ہو جائیں گے۔
