وائس آف گلگت بلتستان کے زیر اہتمام افواج پاکستان اور پاکستان شاہینوں کو خراج تحسین پیش کرنے کیلئے یوم تشکر منایا گیااور ریلی کا انعقاد کیا گیا ۔ ریلی کی قیادت ترجمان صوبائی حکومت فیض اللہ فراق نے کی۔ ریلی کے شرکاء سے ترجمان صوبائی حکومت فیض اللہ فراق ،متحدہ ایکشن کمیٹی کے چیئرمین محمد قاسم ، یوتھ کونسل چیئرمین فواد احمد ، پرعزم یوتھ کے صدر اذہان و دیگر نے خطاب کیا ۔شرکاء سے خطاب کرتے ہوئے ترجمان صوبائی حکومت فیض اللہ فراق نے کہا کہ آج ہم گلگت بلتستان میں یوم تشکر منا رہے ہیں ، ہم نریندر مودی کی جارحیت کو مسترد کرتے ہوئے افواج پاکستان کے دلیرانہ ردعمل پر پاک فضائیہ کے شاہینوں کو خراج تحسین پیش کرتے ہیں ۔
ترجمان نے کہا کہ بھارت کی خوش فہمی اور گھمنڈ کو شاہینوں نے خاک میں ملا دیا ہے ، دہلی اور گجرات کے درو دیوار پاکستانی شاہینوں کے قدموں کی چاپ سے آشنا ہیں ، دنیا کی تاریخ میں پہلی دفعہ شاہینوں نے فضا پر راج کیا ، پاکستانی افواج کی بھرپور کارروائی کے بعد نریندر مودی کے ہوش ٹھکانے آئے اور جنگ سے راہ فرار اختیار کرتے ہوئے عالمی طاقتوں سے ثالثی کیلئے رجوع کیا ۔پاکستان کا دفاع اور بدلہ تاریخ کا حصہ بن چکا ہے اور یہ بات دنیا پر عیاں ہوچکی ہے کہ پاکستان کوئی گاجر مولی نہیں جسے آسانی سے کاٹ دیا جائے بلکہ وہ طاقت ہے جس نے مستقبل میں مسلم امہ کو لیڈ کرنا ہے ، سندھ طاس معاہدہ منسوخ کرنا مودی کے بس کی بات نہیں کیونکہ اس کا ضامن اقوام متحدہ ہے اور کشمیر پر بھارت کا ناجائز قبضہ ہے ، کشمیریوں کو حق خودارادیت کا حق اقوام متحدہ نے دیا ہے ۔ ترجمان نے کہا کہ گزشتہ جنگی ماحول کے دوران بھارت کے خلاف اور افواج پاکستان کے حق میں عوام بھرپور انداز میں گلگت بلتستان کی سڑکوں پر نکلی، ہم سپہ سالار جنرل عاصم منیر کی جرات کو سلام پیش کرتے ہیں
