بجلی بحران کی وجہ سے عوام کو مشکلات درپیش ہیں ، غیر اعلانیہ لوڈشیڈنگ ختم کی جائے، یار محمد
نگران وزیر اعلیٰ گلگت بلتستان جسٹس (ر) یار محمد نے پاور سٹیئرنگ کمیٹی کے اجلاس سے گفتگو کرتے ہوئے کہا ہے کہ بجلی بحران کی وجہ سے عوام کو مشکلات درپیش ہیں اور اذیت سے گزر رہے ہیں۔ عوام کو بجلی کی لوڈشیڈنگ کا دورانیہ کم کرنے کیلئے فوری اور ایمرجنسی بنیادوں پر اقدامات کرنے کی ضرورت ہے۔ہمیں عوام کو درپیش اذیت اور مسائل کا احتساب کرنے کی ضرورت ہے۔ غیر اعلانیہ لوڈشیڈنگ نہ کی جائے اور مقررہ اوقات کار میں ہر صورت بجلی کی فراہمی یقینی بنایا جائے۔ گلگت، سکردو اور چلاس میں بجلی بحران دیگر علاقوں سے بہت زیادہ ہے، ان علاقوں میں خصوصی اقدامات کرتے ہوئے مساوی بنیادوں پر بجلی کی تقسیم یقینی بنانے کی ضرورت ہے۔
سپیشل لائنوں کا خاتمہ کریں۔کنزرویشن کمیٹیوں کے ذریعے غیر قانونی برقی آلات کے استعمال کی حوصلہ شکنی کریں۔ لوڈ مینجمنٹ کے تحت شیڈول کے مطابق بجلی کی فراہمی یقینی بنائیں۔ مارکیٹوں میں غیر قانونی برقی آلات کی فروخت پر پابندی عائد کرتے ہوئے کریک ڈاؤن کیا جائے۔ محکمہ برقیات محلہ سطح پر کنزرویشن کمیٹیاں تشکیل دے اور غیر قانونی برقی آلات کے استعمال کی حوصلہ شکنی کریں۔ تمام سرکاری ملازمین آئندہ دو ہفتوں میں اپنے گھروں میں بجلی کے میٹرز کی تنصیب یقینی بنائیں۔ بغیر میٹرز کے بجلی استعمال کرنے والے ملازمین کے خلاف محکمانہ کارروائی کی جائے۔ صوبائی ٹاسک فورس کنزرویشن کمیٹیوں کی نگرانی کرے اور غیر قانونی کنکشنز کے خلاف بھی کارروائی کی جائے۔ محکمہ لوڈ مینجمنٹ اور شیڈول کو یقینی بنائے۔
