پاکستان کرکٹ بورڈ کے چیئرمین سید محسن نقوی کا کہنا ہے کہ وہ وقت دور نہیں جب پی ایس ایل دنیا کی نمبر ون لیگ بنے گی۔
اے آر وائی نیوز کے مطابق پی سی بی بورڈ آف گورنرز کا 82 واں اجلاس چیئرمین محسن نقوی کی زیر صدارت ہوا، جس میں مالی سال برائے 2024-25 کے سالانہ آڈٹ مالیاتی اسٹیٹمنس کی باضابطہ منظوری دی گئی۔
اجلاس میں آئی سی سی گلوبل اینٹی کرپشن کوڈ کے مطابق پی سی بی کے پروسیجرل رولز، سعودی عرب کرکٹ فیڈریشن سے جدہ میں کرکٹ اسٹیڈیم کی ڈیولپمنٹ کیلیے تعاون میں دلچسپی اور جغرافیائی حدود کی روشنی میں لاہور کے زونز کی دوبارہ حد بندی اور ناموں پر نظرثانی کی منظوری دی گئی اور پی ایس ایل 11 کے لیے ٹیموں کی ریکارڈ نیلامی پر اظہار تشکر کیا گیا۔
اجلاس سے خطاب کرتے ہوئے چیئرمین پی سی بی محسن نقوی کا کہنا تھا کہ پی ایس ایل سرمایہ کاری کے لیے بہترین مارکیٹ بن چکی ہے اور وہ وقت دور نہیں جب پی ایس ایل دنیا کی نمبر ون لیگ بنے گی۔
اجلاس میں بورڈ آف گورنرز کے ممبران، چیف ایگزیکٹو آفیسر پی ایس ایل سمیت دیگر نے شرکت کی جب کہ ظہیر عباس اور سیکریٹری کیبنٹ آن لائن اجلاس میں شریک ہوئے۔
