گلگت بلتستان حکومت نے آفات سے مکانات گرنے ، اموات ،زخمیوں کی کمپنسیشن ادائیگی کیلئے فنڈز جاری کردیئے

محکمہ خزانہ حکومت گلگت بلتستان نے آفات سے مکانات گرنے ، اموات اور زخمیوں کے کمپنسیشن کی ادائیگی کیلئے فنڈز براہ راست متعلقہ اضلاع کے ڈپٹی کمشنرز اور ڈی ڈی اوز کو جاری کر دیئے ۔ یہ فنڈز مجموعی طور پر 93.3 ملین روپے کی رقم پر مشتمل ہے جو مالی سال 26-2025 کے دوران ہونے والی شدید بارشوں اور سیلاب کی وجہ سے پیدا ہونے والے جانی و مالی نقصانات کی تلافی کے لیے مختص کیے گئے ہیں۔چیف سیکریٹری گلگت بلتستان کی منظوری سے ان فنڈز کو فوری طور پر متعلقہ ڈپٹی کمشنرز کو جاری کیا گیا ہے تاکہ متاثرہ افراد کو بروقت اور شفاف طریقے سے معاوضہ فراہم کیا جا سکے۔ ڈپٹی کمشنرز کو ہدایت دی گئی ہے کہ وہ تمام مالی اور انتظامی ضوابط کی پابندی کرتے ہوئے فوری طور پر ان فنڈز کی ادائیگی مکمل کریں تاکہ سیلاب زدگان کو ان کے نقصانات کا ازالہ وقت پر فراہم کیا جا سکے۔ واضح رہے کہ گلگت بلتستان حکومت عوام کی فلاح و بہبود کو اولین ترجیح دیتی ہے اور متاثرہ علاقوں کی فوری بحالی کے لیے تمام وسائل بروئے کار لائے جا رہے ہیں ۔