گلگت ،وادی نلتر میں معذور افراد کے لیے ’’ہائیکنگ اینڈ ایکسپوژر ٹور ‘‘ کا انعقاد
ویژن ویلفیئر فاؤنڈیشن گلگت کے ویمن وِنگ کے زیر اہتمام اور تحصیل انتظامیہ دنیور کے تعاون سے ’’بصارت سے آگے کی دنیا‘‘ کے سلوگن کے تحت معذور افراد کے لیے وادی نلتر میں ’’ہائیکنگ اینڈ ایکسپوژر ٹور ‘‘ کا انعقاد کیا گیا۔اس ہائیکنگ ایونٹ میں بصارت سے محروم 35 طلبہ سمیت دیگر معذوریوں کے حامل افراد نے شرکت کی، جن کی معاونت کے لیے سائٹڈ گائیڈز بھی ان کے ہمراہ تھے۔شرکا نے وادی نلتر میں سکینگ پوائنٹ کی آخری بلندی تک ہائیکنگ کی جس سے ان کی خوشی، جوش و جذبے اور خود اعتمادی میں واضح اضافہ دیکھنے کو ملا۔اس سرگرمی کا بنیادی مقصد بصارت سے محروم افراد کی معاشرتی شمولیت، ذہنی و جسمانی صحت کی بہتری اور ماحولیاتی آگاہی کو فروغ دینا تھا۔ اس موقع پر ویژن ویلفیئر فاؤنڈیشن گلگت اور اس کے ویمن وِنگ کی جانب سے اسسٹنٹ کمشنر دنیور محمد عامر تحسین کا خصوصی شکریہ ادا کیا گیا جنہوں نے اس شاندار ایونٹ کے انعقاد کو ممکن بنانے کے لیے سپانسرشپ فراہم کی ۔
