قراقرم انٹرنیشنل یونیورسٹی سپورٹس گالہ 2025، فائنل جیتنے کیلئے ٹیموں کے مابین سخت مقابلوں نے ایونٹ کو ناقابل فراموش بنا دیا
قراقرم انٹرنیشنل یونیورسٹی کے زیراہتمام جاری سالانہ سپورٹس گالہ 2025 اپنے عروج پر پہنچ گیا ہے۔شعبہ تعلقات عامہ کے آئی یو کے مطابق یونیورسٹی کے مرکزی کیمپس گلگت میں منعقدہ رنگارنگ ایونٹ میں فٹ بال، والی بال، کرکٹ، باسکٹ بال اور دیگر کھیلوں کے مقابلوں نے طلبہ اور شائقین کو جوش و خروش سے بھر دیا۔
فائنل جیتنے کے لیے ٹیموں کے مابین سخت مقابلوں نے ایونٹ کو ناقابل فراموش بنا دیا۔کرکٹ کے میدان میں طلبہ نے اپنی بیٹنگ اور باؤلنگ سے شائقین کو خوب محظوظ کیا۔ شعبہ سپورٹس سائنسز کی ٹیم نے مینجمنٹ سائنسزکو34رنز سے ہر ا کر کرکٹ فائنل کی چمپئن بننے کا اعزاز اپنے نام کیا۔باسکٹ بال کے فائنل مقابلے میں رفتار، چستی اور حکمت عملی کا شاندار امتزاج دیکھنے کو ملا۔
شعبہ بزنس مینجمنٹ نے شعبہ فوڈ اینڈ ایگریکلچر کو ہرا کر باسکٹ بال چمپئن کا ایوارڈاپنے نام کیا۔ اس سے قبل فٹ بال کے میدان میں ٹیموں نے اپنی مہارتوں کا بھرپور مظاہرہ کیا۔ سیمی فائنل میں شعبہ سپورٹس سائنسز کی ٹیم نے شعبہ مینجمنٹ سائنسز کو سنسنی خیز مقابلے کے بعد 1-0 سے شکست دی۔ دوسرے سیمی فائنل میں شعبہ کمپیوٹر سائنسز نے شعبہ فارسٹری کو ہرایا۔
والی بال کورٹ پر بھی زبردست ایکشن دیکھنے کو ملا۔ شعبہ کمپیوٹر سائنسز کی ٹیم نے اپنی شاندار سروسز اور سماشز کے ساتھ شعبہ آرتھ سائنسز کو 2-1 سے ہرایا۔ دوسری جانب، شعبہ آئی آر نے شعبہ ایجوکیشن کے خلاف 2-1 سے فتح حاصل کی۔کے آئی یو کے سپورٹس ڈائریکٹر اورنگزیب نے کہاکہ قراقرم انٹرنیشنل یونیورسٹی کا سپورٹس گالہ 2025 طلبہ کے ٹیلنٹ، جوش اور جذبے کا شاندار مظہر ثابت ہوگا، یہ ایونٹ نہ صرف کھیلوں کے فروغ کا ذریعہ بنا بلکہ یونیورسٹی کے طلبہ کے درمیان اتحاد اور بھائی چارے کو بھی مضبوط کرنے میں اہم کردار ادا کر رہا ہے۔
