وائس چانسلر کے آئی یو کے امتحانات میں شفافیت یقینی بنانے کیلئے سخت اقدامات، چھاپہ مار ٹیموں کا قیام،ٹیموں کی کارروائیاں جاری
قراقرم انٹرنیشنل یونیورسٹی کے وائس چانسلر پروفیسر ڈاکٹر عطاء اللہ شاہ کی خصوصی ہدایات پر جامعہ قراقرم نے امتحانات میں شفافیت لانے اور نقل کی لعنت کے خاتمے کے لیے مؤثر اقدامات کا آغاز کر دیا ہے۔شعبہ تعلقا ت عامہ کے آئی یو کے مطابق اس سلسلے میں شعبہ امتحانات کی جانب سے مختلف امتحانی مراکز پر اچانک معائنہ کرنے کے لیے چھاپہ مار ٹیمیں تشکیل دی گئی ہیں۔اس سلسلے میں جامعہ کے قائم مقام ٹریژرار نعمان بٹ کی سربراہی میں چھاپہ مار ٹیم نے متعدد امتحانی مراکز کا دورہ کیا،جہاں نقل میں ملوث طلباء کے خلاف سخت کارروائی عمل میں لائی گئی۔ وائس چانسلر کی خصوصی دلچسپی اور رہنمائی میں کنٹرولر امتحانات واجد حسین کی زیر نگرانی میں یہ ٹیمیں گلگت بلتستان کے مختلف علاقوں میں امتحانی عمل کی نگرانی کر رہی ہیں،جس کا مقصد تعلیمی میدان میں دیانت داری اور میرٹ کو فروغ دینا ہے۔کنٹرولر امتحانات نے کہاہے کہ ایسے اقدامات آئندہ بھی جاری رہیں گے تاکہ طلباء کی صلاحیتوں کا درست اور منصفانہ انداز میں جائزہ لیا جا سکے۔
