ڈسٹرکٹ پولیس گلگت نے سوشل میڈیا پر فرقہ وارانہ نفرت، اشتعال انگیزی اور توہین آمیز مواد شیئر کرنے والے عناصر کے خلاف جاری کریک ڈاؤن کے دوران تین ملزمان کو گرفتار کر لیا۔پولیس ترجمان کے مطابق کارروائیاں زیرو ٹالرنس پالیسی کے تحت عمل میں لائی گئیں۔ گرفتار افراد پر الزام ہے کہ وہ سوشل میڈیا پلیٹ فارمز کے ذریعے مذہبی دل آزاری اور نفرت انگیز مواد کی تشہیر میں ملوث تھے۔
پولیس نے بتایا کہ مختلف مقامات پر دن بھر کی کارروائیوں کے دوران ملزمان کو حراست میں لیا گیا۔ترجمان کا کہنا تھا کہ قانون کی خلاف ورزی کرنے والوں کے خلاف بلاامتیاز سخت قانونی کارروائی کی جائے گی اور کسی کو بھی امن و امان خراب کرنے کی اجازت نہیں دی جائے گی۔پولیس نے عوام سے اپیل کی ہے کہ وہ ذمہ دار شہری ہونے کا ثبوت دیتے ہوئے ایسے عناصر کی نشاندہی کریں اور معاشرے میں امن و ہم آہنگی برقرار رکھنے کے لیے قانون نافذ کرنے والے اداروں سے تعاون جاری رکھیں۔
