گلگت یوتھ کے مختلف صدور نے غیر قانونی شناختی کارڈ ، ڈومیسائل ،پاسپورٹ اجرا کی تحقیقات کیلئے نگران وزیر داخلہ کو درخواست دائر کردی
گلگت یوتھ کے مختلف صدور کی جانب سے نگراں وزیر داخلہ گلگت بلتستان ساجد علی بیگ کو غیر قانونی شناختی کارڈ ، ڈومیسائل اور پاسپورٹ کے اجرا کے معاملے پر شفاف اور غیر جانبدار انکوائری کے لیے باقاعدہ درخواست پیش کر دی گئی۔
درخواست میں موقف اختیار کیا گیا کہ غیر قانونی دستاویزات کے اجرا سے نہ صرف مقامی شہریوں کے حقوق متاثر ہو رہے ہیں بلکہ یہ معاملہ خطے کی سیکیورٹی کے لیے بھی سنگین نوعیت اختیار کر سکتا ہے۔
وفد نے مطالبہ کیا کہ مکمل اور شفاف تحقیقات کے ذریعے ذمہ دار عناصر کو قانون کے کٹہرے میں لایا جائے جس پر وزیر داخلہ ساجد علی بیگ نے فورا متعلقہ حکام کو ہدایات جاری کرتے ہوئے کہا کہ اس حساس معاملے کی جامع اور غیر جانبدار انکوائری عمل میں لائی جائے اور اگر کسی بھی سطح پر بے ضابطگی یا کوتاہی ثابت ہو تو ذمہ داران کے خلاف سخت قانونی کارروائی کی جائے۔ انہوں نے واضح کیا کہ قانون کی بالادستی اور عوامی مفاد پر کوئی سمجھوتہ نہیں کیا جائے گا ۔
