قومی بیانئے کی موثر تشکیل ،منفی پروپیگنڈے کی روک تھام کے لیے منظم، جامع ،مضبوط لائحہ عمل ترتیب دیا جائے ، نگران وزیر اطلاعات گلگت
نگران وزیر اطلاعات گلگت بلتستان غلام عباس نے حکام کو اطلاعات شعبے میں مزید بہتری لانے، جدید ٹیکنالوجی کے استعمال کو فروغ دینے اور عوامی مفاد سے متعلق منصوبوں میں تیزی لانے پر زور دیا ہے۔بدھ کو نگران وزیر اطلاعات نے محکمہ اطلاعات کا دورہ کیا جہاں سیکرٹری اطلاعات حاجی ثنا اللہ نے انہیں محکمے کے حوالے سے تفصیلی بریفنگ دی ۔اس موقع پر ڈپٹی ڈائریکٹر اطلاعات فاروق احمد، اسسٹنٹ ڈائریکٹر محمد سلیم خان سمیت محکمے کے دیگر افسران بھی موجود تھے ۔
بریفنگ کے دوران محکمہ اطلاعات کے جاری اور آئندہ منصوبوں، مختلف ترقیاتی اقدامات ، ڈیجیٹلائزیشن کے شعبوں میں پیشرفت اور مجموعی کارکردگی پر تفصیلی بریف کیا ۔ نگران وزیر نے محکمے کی جاری کاوشوں کو سراہا اور اطلاعات کے شعبے میں مزید بہتری لانے، جدید ٹیکنالوجی کے استعمال کو فروغ دینے اور عوامی مفاد سے متعلق منصوبوں میں تیزی لانے پر خصوصی زور دیا ۔انہوں نے اس موقع پر ہدایت جاری کی کہ قومی بیانئے کی موثر تشکیل اور منفی پروپیگنڈے کی روک تھام کے لیے ایک منظم، جامع اور مضبوط لائحہ عمل ترتیب دیا جائے تاکہ عوام تک درست اور مثبت معلومات بروقت پہنچائی جا سکیں۔
