اگر بھارت ہاتھ نہیں ملانا چاہتا تو ہمیں بھی شوق نہیں، چیئرمین پی سی بی

پاکستان کرکٹ بورڈ کے چیئرمین محسن نقوی نے کہا ہے کہ اگر بھارت ہاتھ نہیں ملانا چاہتا تو ہمیں بھی کوئی شوق نہیں ہے۔ چیئرمین پی سی بی محسن نقوی نے لاہور میں پریس کانفرنس کرتے ہوئے ایک بار پھر بھارت کو دوٹوک جواب دیتے ہوئے کہہ دیا کہ تعلقات برابری کی بنیاد پر ہی ہوں گے۔ اگر بھارت کھیل کے میدان میں ہاتھ نہیں ملانا چاہتا، تو ہمیں بھی کوئی شوق نہیں ہے۔

چیئرمین پی سی بی نے کہا کہ پاکستان سپر لیگ 2026 شاندار اور جاندار ہوگی۔ وسیم اکرم کو پی ایس ایل کا برانڈ ایمبیسیڈر مقرر کیا گیا ہے۔ دو نئی ٹیموں کے لیے 8 جنوری کو اسلام آباد کے کنونشن سینٹر میں تاریخی بولی لگے گی۔

محسن نقوی نے مزید کہا کہ اس سال ملتان سلطانز کے معاملات پی سی بی خود دیکھے گا۔ اگلے سال کسی سابق کرکٹر کو معاملات سونپے جائیں گے۔ان کا کہنا تھا کہ ہم جونیئر کرکٹ پر بہت کام کر رہے ہیں جس کا نتیجہ سب سے کے سامنے ہے۔ قومی ٹیم کے ریڈ بال ہیڈ کوچ کا تقرر جلد ہو جائے گا۔واضح رہے کہ رواں برس سینئر مینز ایشیا کپ میں بھارت کی جانب سے پاکستانی کھلاڑیوں سے ہاتھ نہ ملانے کا شروع ہونے والا سلسلہ غلط روایات قائم کرتا ہوا اب تک جاری ہے اور حال ہی میں جونیئر ایشیا کپ میں بھی بھارتی کرکٹرز نے روایتی مصافحہ نہیں کیا۔