چیف سیکرٹری گلگت بلتستان نے رام گھاٹ بونجی میں 2,516 ایکڑ آبپاشی و زمین آبادکاری منصوبے کا افتتاح کر دیا
چیف سیکرٹری گلگت بلتستان ابرار احمد مرزا نے ETI-GB پروگرام کے تحت مکمل ہونے والے رام گھاٹ آبپاشی اور زمین آبادکاری منصوبے کا بونجی، ضلع استور میں باضابطہ افتتاح کر دیا۔ یہ منصوبہ انٹرنیشنل فنڈ فار ایگریکلچرل ڈویلپمنٹ کے تعاون سے اکنامک ٹرانسفارمیشن انیشی ایٹو گلگت بلتستان (ETI-GB) نے محکمہ واٹر مینجمنٹ اینڈ ایریگیشن اور مقامی سکیم مینجمنٹ ٹیم کے اشتراک سے مکمل کیا ہے۔منصوبے کے تحت 2,516 ایکڑ (20,128 کنال) بنجر اراضی کو قابلِ کاشت بنایا گیا ہے، جو ماضی میں قدرتی آفات سے متاثر رہی تھی۔ منصوبے میں 9.62 کلومیٹر طویل آبپاشی چینل تعمیر کیا گیا ہے جس سے 997 گھرانوں کو سال بھر پانی کی فراہمی ممکن ہوگی۔ منصوبے پر مجموعی طور پر 149.47 ملین روپے لاگت آئی۔
اس موقع پر چیف سیکرٹری نے کہا کہ زمین کے ریکارڈ کی ڈیجیٹلائزیشن اور GIS میپنگ شفافیت اور جدید حکمرانی کی بہترین مثال ہے، جو مستقبل کے ترقیاتی منصوبوں کے لیے ایک ماڈل ثابت ہوگی۔انہوں نے ETI-GB اور تمام شراکت دار اداروں کی کارکردگی کو سراہا۔افتتاحی تقریب میں سینئر ممبر بورڈ آف ریونیو ولی خان، سیکرٹری واٹر مینجمنٹ اینڈ ایریگیشن سبطین احمد، ڈپٹی کمشنر استور محمد اویس عباسی، ETI-GB کے اعلیٰ حکام، مقامی نمائندے اور بڑی تعداد میں عوام نے شرکت کی۔واضح رہے کہ ETI-GB پروگرام 2015 سے اب تک 193 ترقیاتی سکیمیں مکمل کر چکا ہے، جن سے 45,503 گھرانے مستفید ہو رہے ہیں، جبکہ مستقبل میں 70 ہزار ایکڑ نئی زمین کو زیرِ کاشت لانے کا ہدف مقرر کیا گیا ہے۔
