عاقب جاوید نے کہا ہے کہ کرکٹ میں ہاتھ نہ ملانے والا بھارت اب پاکستان سے کوچنگ کی درخواست کرنے لگا ہے۔
پاکستان کرکٹ بورڈ کے ڈائریکٹر ہائی پرفارمنس عاقب جاوید نے پی سی بی پوڈکاسٹ میں گفتگو کرتے ہوئے بتایا کہ پی سی بی اوورسیز پروگرام میں شرکت کے لیے بھارت سے بھی درخواست آئی ہے۔ عاقب جاوید نے کہا کہ بھارت سے فون آیا کہ انہیں اپنے فاسٹ بولرز کے لیے گائیڈ لائنز چاہئیں۔
ڈائریکٹر ہائی پرفارمنس کا کہنا تھا کہ ٹیم کی شکست پر تنقید کرنا شائقینِ کرکٹ کا حق ہے۔ انہوں نے کہا کہ ان کا پاکستان ٹیم کا کوچ یا ڈائریکٹر بننے کا کوئی ارادہ نہیں تھا۔
ان کا مزید کہنا تھا کہ پی سی بی چیئرمین سے ملاقات میں لگا کہ وہ کچھ کرنا چاہتے ہیں۔ محسن نقوی سلیکشن میں کبھی مداخلت نہیں کرتے۔
عاقب جاوید نے پاکستان کرکٹ کے مستقبل اور ہائی پرفارمنس ڈھانچے پر اظہارِ خیال کرتے ہوئے کہا کہ ٹیم کی بہتری کا انحصار کھلاڑیوں کے معیار اور مضبوط بینچ اسٹرینتھ پر ہے۔ تاہم اس وقت پاکستان کرکٹ درست سمت میں آگے بڑھ رہی ہے۔
ہائی پرفارمنس ڈائریکٹر نے یہ بھی کہا کہ انفراسٹرکچر اور جدید سہولیات پائیدار ہائی پرفارمنس کرکٹ کی بنیاد ہیں۔ پچوں کی تیاری میں اصلاحات اور مختلف کنڈیشنز پر توجہ دی جا رہی ہے۔
