قراقر م انٹرنیشنل یونیورسٹی میں منعقدہ چار روزہ ”یوتھ ایمپلائیبلٹی اینڈ سافٹ سکلز“ ٹریننگ کامیابی کے ساتھ اختتام پذیر ہوگئی
قراقرم انٹرنیشنل یونیورسٹی میں ”یوتھ ایمپلائیبلٹی اینڈ سافٹ سکلز“ کے عنوان پر منعقدہ چار روزہ ٹریننگ اختتام پذیر ہو گئی۔شعبہ تعلقات عامہ کے آئی یو کے مطابق اس جامع ٹریننگ میں حال ہی میں گریجویٹ ہونے والے طلبہ و طالبات کو مواصلاتی مہارتیں، قائدانہ صلاحیتیں، ٹیم ورک، پیشہ ورانہ تیاری اور موجودہ ملازمت کے مارکیٹ میں کامیابی کیلئے ضروری سافٹ سکلز سکھائی گئی اوربراڈننگ اکنامک اینڈ سوشل ٹرانسفارمیشن فار ویمنز اکنامک ایمپاورمنٹ جس میں خواتین کی معاشی خودمختاری اور معاشرے میں ان کے کردار کو مضبوط کرنے کے عملی طریقوں پر زور دیا گیا۔تجربہ کار ٹرینرز نے جامعہ قراقرم اور AKRSP کی طرف سے انٹرایکٹو سیشنز، پریکٹیکل مشقیں اور گروپ سرگرمیوں کے ذریعے نوجوان گریجویٹس کو تربیت دی۔
سرٹیفکیٹ تقسیم کی تقریب سے خطاب کرتے ہوئے انسٹی ٹیوٹ فار پروفیشنل ڈویلپمنٹ جامعہ قراقرم شعبہ ایجوکیشن کے ایسوسی ایٹ پروفیسر ڈاکٹر صدرالدین قطوشی اور شعبہ کمپیوٹر سائنسز کے لیکچرر عمران علی و دیگر نے اس مفید اور نتیجہ خیز ٹریننگ کو سراہا اور AKRSP کا خصوصی طور پر شکریہ ادا کیا۔انہوں نے کہا کہ تعلیمی نصاب اور مارکیٹ کی ضروریات کے درمیان خلیج کو کم کرنے کے لیے اس قسم کے اشتراک انتہائی اہم ہیں۔شرکاء نے ٹریننگ کو انتہائی مفید قرار دیتے ہوئے بتایا کہ اس نے ان کا اعتماد بڑھایا اور پیشہ ورانہ زندگی کے چیلنجز سے نبردآزما ہونے کے لیے انہیں تیار کر دیا ہے۔”یوتھ ایمپلائیبلٹی اینڈ سافٹ سکلز“ ٹریننگ گلگت بلتستان کے نوجوانوں کو بااختیار بنانے اور علاقے میں پائیدار معاشی و سماجی ترقی کیلئے جامعہ قراقرم اور AKRSP کے جاری مشترکہ کاوشوں کا حصہ ہے۔یا درہے کہ چار روزہ ٹریننگ کا انعقاد قراقرم انٹرنیشنل یونیورسٹی اور آغا خان رورل سپورٹ پروگرام (AKRSP) نے مشترکہ طورپر کیاتھا۔
