گلگت بلتستان ، لیڈی ہیلتھ ورکرز کی تعیناتی میں بے ضابطگیوں کے خلاف تحقیقات کا آغاز
اینٹی کرپشن اسٹیبلشمنٹ گلگت بلتستان نے لیڈی ہیلتھ ورکرز کی تعیناتی میں بے ضابطگیوں کے خلاف تحقیقات کا آغاز کر دیا ہے۔ ترجمان اینٹی کرپشن اسٹیبلشمنٹ گلگت بلتستان کی طرف سے جاری ایک بیان کے مطابق لیڈی ہیلتھ ورکرز کی تقرریوں میں ممکنہ ضابطہ اخلاق کی خلاف ورزیوں اور شکایات کی بنیاد پر اینٹی کرپشن اسٹیبلشمنٹ کی جانب سے ایک اہم اجلاس منعقد ہوا، جس میں عوامی مفاد کے اس معاملے کے تمام پہلوؤں کا تفصیلی جائزہ لیا گیا۔اجلاس کے بعد باقاعدہ تحقیقات کے احکامات جاری کیے گئے ہیں۔ اس سلسلے میں ایک خصوصی کمیٹی تشکیل دی گئی ہے جو اینٹی کرپشن اسٹیبلشمنٹ کے قوانین و ضوابط کے مطابق معاملے کی مکمل چھان بین کرے گی اور اپنی سفارشات پیش کرے گی۔ کمیٹی کو ہدایت دی گئی ہے کہ وہ تحقیقات جلد از جلد مکمل کر کے رپورٹ پیش کرے۔ اینٹی کرپشن اسٹیبلشمنٹ عوام الناس سے درخواست کرتی ہے کہ اگر کسی کے پاس لیڈی ہیلتھ ورکرز کی تقرریوں سے متعلق کوئی ایسی معلومات ہوں جو تحقیقات میں معاون ثابت ہو سکیں، تو وہ متعلقہ دفتر میں رابطہ کریں یا درج ذیل نمبر پر کال / واٹس ایپ کر کے معلومات فراہم کریں۔
