طلبہ اپنی تحقیق کو معاشرتی مسائل کے حل اور سماجی بہتری پر مرکوز کریں ،پروفیسر ڈاکٹر عطاء اللہ شاہ
قراقرم انٹرنیشنل یونیورسٹی کے فیکلٹی آف سوشل سائنسز کے زیر اہتمام تیسرا علمی اور تحقیقی موضوع پرمباحثہ شاندار انداز میں منعقد ہوا۔افتتاحی تقریب میں وائس چانسلر پروفیسر ڈاکٹر عطاء اللہ شاہ نے بطور مہمان خصوصی شرکت کی۔ ان کے ہمراہ یونیورسٹی کے تدریسی افسران، شعبہ جات کے سربراہان بشمول انٹرنیشنل ریلیشنز، اکنامکس اور بزنس مینجمنٹ سائنسز، اور تحقیق کے طلبہ و طالبات موجود تھے۔اپنے خطاب میں وائس چانسلر پروفیسر ڈاکٹر عطاء اللہ شاہ نے کولوکیم کو گلگت بلتستان میں تحقیقی سرگرمیوں کے فروغ کے لیے سنگ میل قرار دیا۔ انہوں نے طلبہ پر زور دیا کہ وہ اپنی تحقیق کو معاشرتی مسائل کے حل اور سماجی بہتری پر مرکوز کریں تاکہ اس سے مقامی کمیونٹی کو براہ راست فائدہ پہنچے۔
انہوں نے کولوکیم کے کامیاب انعقاد پر منتظمین کی کاوشوں کو سراہتے ہوئے کہا کہ یہ پلیٹ فارم نوجوان محققین کے لیے نئی تحقیقی جہتوں سے آگاہی حاصل کرنے کا بہترین ذریعہ ہے۔اس سے قبل، ڈائریکٹر اکیڈمکس ڈاکٹر سجاد علی نے معیاری تعلیم و تحقیق کے فروغ کے لیے وائس چانسلر کے اقدامات کو قابل تقلید قرار دیا۔ کولوکیم کے دوران ایم فل اور پی ایچ ڈی کے طلبہ و طالبات نے اکنامکس، انٹرنیشنل ریلیشنز، اور بزنس مینجمنٹ سائنسز کے شعبوں میں اپنے تحقیقی مقالوں اور سائنپسز پیش کیے۔ شرکاء نے طلبہ کے مقالوں پر سوالات اٹھائے اور قیمتی تجاویز بھی پیش کیں۔جس سے تقریب میں علمی و فکری مکالمے کو فروغ ملا۔واضح رہے کہ یہ کولوکیم نہ صرف طلبہ کے تحقیقی معیار کو اجاگر کرنے کا موقع فراہم کرتا ہے بلکہ گلگت بلتستان کے سماجی و معاشی مسائل کے حل کے لیے نئے خیالات کو بھی سامنے لاتا ہے۔ کولوکیم کے آرگنائز ایسوسی ایٹ ڈین فیکلٹی آف سوشل سائنسز ڈاکٹر ضیغم علی تھے۔اس سے قبل وائس چانسلر نے ہائیر ایجوکیشن ڈویلپمنٹ پراجیکٹ کے حوالے سے منعقدہ اجلا س کی صدارت بھی کی۔
