ایڈیشنل چیف سیکریٹری کا گلگت میں سماجی ترقیاتی منصوبوں کا دورہ، ہسپتال اور سیوریج سسٹم کی جلد تکمیل پر زور

 ایڈیشنل چیف سیکریٹری گلگت بلتستان مشتاق احمد نے گلگت کے نواحی علاقے جٹیال میں دو اہم سماجی ترقیاتی منصوبوں کا دورہ کیا۔ یہ منصوبے 50 بستروں پر مشتمل کارڈیک ہسپتال اور مین گریوٹی ٹرنک سیوریج پروجیکٹ پر مشتمل تھے۔کارڈیک ہسپتال کے معائنے کے دوران سیکریٹری صحت، میڈیکل سپرنٹنڈنٹ اور پراجیکٹ ڈائریکٹر نے ایڈیشنل چیف سیکریٹری کو منصوبے کی موجودہ صورتحال سے آگاہ کیا۔بریفنگ میں بتایا گیا کہ ہسپتال کو فعال بنانے کے لیے درکار 15 اہم بائیو میڈیکل آلات موجودہ بجٹ کی بچت اور 15 فیصد اضافی مجاز حد کے تحت خریدے جا سکتے ہیں۔ایڈیشنل چیف سیکریٹری نے محکمہ صحت کو ہدایت دی کہ ڈائریکٹر جنرل پی پی آر اے گلگت بلتستان سے مشاورت کے بعد فوری طور پر ان آلات کی خریداری کا عمل شروع کیا جائے تاکہ تمام قانونی تقاضے پورے ہوں اور ہسپتال جلد از جلد فعال ہو سکے۔