وزیر اعلیٰ گلگت بلتستان کی زیر صدارت کابینہ کا سولہواں اجلاس ،افواج پاکستان کو خراج تحسین
وزیر اعلیٰ گلگت بلتستان حاجی گلبر خان کی زیر صدارت کابینہ کا سولہواں اجلاس منعقد ہوا ۔اجلاس میں پاک فوج کی جانب سے بھارت کو دندان شکن جواب دینے پر افواج پاکستان کو خراج تحسین پیش کیا گیااور شہدا کے درجات کی بلندی کے لئے دعا کی گئی ۔کابینہ اجلاس کے بعد وزیر داخلہ شمس لون،وزیر ترقیات و منصوبہ بندی راجہ ناصر علی خان،ایکسائزاینڈ ٹیکسیشن کے وزیر رحمت خالق اور معاون خصوصی برائے اطلاعات ایمان شاہ نے میڈیا کو بریفنگ دیتے ہوئے کہا کہ اجلاس میں گلگت بلتستان میں تمباکو کنٹرول ایکٹ کی منظوری سمیت خالی آسامیوں پر تقرری کے لئے ٹیسٹنگ ایجنسی کے قیام ،ایڈونچر ٹورازم کے حوالے سے مقررہ فیس میں کمی اور ڈویلپمنٹ سیکٹر میں اپوزیشن ممبران کو حکمران جماعت کے ممبران کے برابر فنڈز دینے کا فیصلہ کیا گیاہے۔
کابینہ نے چار نئے اضلاع کے ڈی سیز اور ایس پیز کو دیگر اضلاع کے ڈی سیز اور ایس پیز کے برابر اختیارات دینے ،لینڈ ریفارمز ایکٹ میں ضروری ترامیم سمری کے ذریعے آئندہ ایک ہفتے میں منظور کرنے اور جی بی پاور ڈویلپمننٹ ایکٹ کی منظوری دی جس کی اسمبلی سے منظوری کے بعد باضابطہ طور پر پاور اتھارٹی کا قیام عمل میں لایا جائے گا۔اجلاس میں موجودہ سیکیورٹی صورتحال، ترقیاتی سکیموں، تعلیمی و انتظامی اصلاحات سمیت متعدد اہم فیصلے کئے گئے،چار ایڈیشنل ڈپٹی کمشنرز کو کلیکٹر اختیارات کی منظوری دی گئی۔
ضلع گانچھے میں دانش سکول کے لیے سرکاری زمین کی الاٹمنٹ کی منظوری، توانائی کے شعبے میں اصلاحات اور بجلی کی ترسیل سے متعلق قانون سازی کی منظوری دی گئی ہے اور لینڈ ریفارمز ایکٹ ایک ہفتے کے اندر سمری کے ذریعے اگلے کابینہ اجلاس میں لایا جائے گا۔ کابینہ اجلاس کے متعلق وزراء نے کہا کہ منصفانہ طریقے سے جی بی ٹیسٹنگ سروس کے قیام کی باقاعدہ منظورہ دی گئی،5 گریڈ سے 15 گریڈ تک کی آسامیوں پر جی بی ٹیسٹنگ سروس کے زریعے اس عمل کو پایہ تکمیل تک پہنچایا جائے گا۔
ہم نے پچھلی حکومتوں کو بھی دیکھا ہے جہاں اپنی مرضی سے امتحانات لئے گئے،ہمارا فوکس میرٹ کو یقینی بناناہے۔کابینہ اجلاس کے دوران افواجِ پاکستان کو زبردست خراج تحسین پیش کیا گیااور اس عزم کا اعادہ کیا کہ گلگت بلتستان کے عوام ہر محاذ پر وطن عزیز کے ساتھ کھڑے ہیں۔ اجلاس میں کہا گیا کہ ہمارے آباؤ اجداد نے ڈوگرہ راج کو بھگا کر آزادی حاصل کی، آج بھی ہم اسی جذبے سے سرشار ہیں۔کابینہ اجلاس میں تمام وزراء،معاون خصوصی برائے اطلاعات ایمان شاہ اور متعلقہ اداروں کے سیکریٹریز نے شرکت کی۔
Facebook Twitter Reddit
