گلگت بلتستان ،جدید طرز حکمرانی کی جانب اہم قدم ،ای آفس پلیٹ فارم مکمل طور پر فعال کر دیاگیا
حکومت گلگت بلتستان نے جدید طرز حکمرانی کی جانب ایک اہم قدم اٹھاتے ہوئے ای آفس پلیٹ فارم کو مکمل طور پر فعال کر دیا، نظام کے تحت اب تمام اہم سرکاری امور بشمول فائلوں، سمریز اور نوٹسز کی ترسیل، ڈیجیٹل انداز میں انجام دی جائے گی۔محکمہ سروسز، جنرل ایڈمنسٹریشن اینڈ کیبنٹ کی جانب سے جاری اعلامئے کے مطابق، ابتدائی مرحلے میں وہ تمام دفتری نوٹسز اور سمریز جو چیف سیکریٹری، وزیر اعلی اور گورنر گلگت بلتستان کو ارسال کی جاتی ہیں، اب صرف ای آفس پلیٹ فارم کے ذریعے ہی بھیجی جائیں گی۔اعلامیہ میں مذید کہا گیا ہے کہ تمام ایڈمنسٹریٹو سیکریٹریز کو جلد اس پلیٹ فارم کے حوالے سے آگاہی اوریئنٹیشن سیشنز کا اہتمام کیا جائے گاتاکہ نظام کے موثر استعمال کو یقینی بنایا جا سکے۔
اعلامئے میں تمام سیکرٹریز کو ہدایت کی گئی ہے کہ وہ اپنے سرکاری یا ذاتی لیپ ٹاپس پر ای آفس سسٹم کو جلد از جلد فعال کریں۔اس سلسلے میں پرفارمنس مینجمنٹ اینڈ ریفارمز یونٹ کی ٹیم تکنیکی معاونت فراہم کرے گی تاکہ کسی بھی قسم کی دشواری کا فوری حل ممکن ہو۔واضح رہے کہ حکومت گلگت بلتستان کا یہ اقدام خطے میں ای گورننس اور شفافیت کے فروغ کی جانب ایک اہم پیش رفت ہے، جو نہ صرف دفتری کارکردگی کو بہتر بنائے گا بلکہ وقت اور وسائل کی بچت کے ساتھ ساتھ شفافیت، رفتار اور کارکردگی کو بہتر بنانے میں مددگار ثابت ہوگا ۔
