چیف سیکرٹری گلگت بلتستان کی زیر صدارت ہنگامی صورتحال سے نمٹنے کے لیے اعلیٰ سطحی اجلاس
خطے میں ہنگامی صورتحال سے نمٹنے کی تیاریوں کو مزید مؤثر بنانے کے لیے چیف سیکرٹری گلگت بلتستان کی زیر صدارت ایک اعلیٰ سطحی اجلاس منعقد ہوا۔ اس اہم اجلاس میں تمام متعلقہ اداروں کے اعلیٰ افسران بشمول صوبائی سیکرٹریز، کمشنرز، ڈپٹی کمشنرز اور ڈائریکٹر جنرل جی بی ڈی ایم اے نے شرکت کی، جس میں موجودہ سیکیورٹی صورتحال کا جائزہ لیا گیا۔سیکریٹری داخلہ نے حالیہ بھارتی فضائیہ کی جارحیت کے تناظر میں ممکنہ خطرات پر تفصیلی بریفنگ دی۔اجلاس میں چیف سیکریٹری گلگت بلتستان نے واضح کیا کہ حکومت ہر قسم کی ہنگامی صورتحال سے نمٹنے کے لیے مکمل طور پر تیار اور فعال ہے اور ہنگامی حالات میں فوری طبی سہولیات کی فراہمی یقینی بنانے کے لیے محکمہ صحت کو درج ذیل اقدامات کی ہدایت دی گئی،جس میں تمام ہسپتالوں کو الرٹ رکھا جائے اور مکمل فعالیت کو یقینی بنایا جائے۔تمام طبی عملہ بشمول ڈاکٹرز، نرسز اور پیرا میڈیکس کی چھٹیاں منسوخ کرتے ہوئے انہیں بھی ہائی الرٹ رکھا جائے۔خون کے ذخائر کو محفوظ رکھا جائے اور فوری طور پر خون عطیہ کرنے کی مہم شروع کی جائے۔اجلاس میں تمام کمشنرز اور ڈپٹی کمشنرز کو ہدایت دی گئی کہ وہ ہمہ وقت ہائی الرٹ رہیں اور حکومتی مشینری کو مکمل فعال رکھیں۔مواصلاتی نظام کی بلا تعطل فعالیت کو یقینی بنایا جائے۔اجلاس میں یہ بھی فیصلہ کیا گیا کہ خوراک اور اناج کے ذخائر کا تفصیلی جائزہ لینے کی ہدایت دی گئی تاکہ کسی بھی ممکنہ ضرورت کو پورا کیا جا سکے۔ سیکریٹری داخلہ اور سیکریٹری ایکسائز کو پی او ایل ڈپو کا معائنہ کرنے کا حکم دیا گیا تاکہ ایندھن کی دستیابی یقینی بنائی جا سکے۔اس اہم اجلاس میں ڈپٹی کمشنرز کو ہدایت کی گئی کہ وہ تمام برادریوں، خصوصاً سرحدی علاقوں سے قریبی رابطے میں رہیں اور انہیں تازہ ترین صورتحال سے بروقت آگاہ کرتے رہیں۔اجلاس میں چیف سیکریٹری گلگت بلتستان نے اس عزم کا اعادہ کیا کہ حکومت گلگت بلتستان تمام وسائل بروئے کار لاتے ہوئے کسی بھی ممکنہ صورتحال سے مؤثر انداز میں نمٹنے کے لیے مکمل طور پر تیار ہے اور عوام کی سلامتی و تحفظ حکومت کی اولین ترجیح ہے۔
