ڈپٹی کمشنر گلگت کی زیر صدارت محکموں کی کارکردگی پر اجلاس، ترقیاتی منصوبے بروقت مکمل کرنے کی ہدایت
ڈپٹی کمشنر / ڈسٹرکٹ مجسٹریٹ گلگت امیر اعظم حمزہ کی زیر صدارت مختلف محکموں کی کارکردگی کا جائزہ لینے کے حوالے سے ایک اہم اجلاس منعقد ہوا۔ اجلاس میں ایکسئین بی اینڈ آر، ایکسئین پی ایچ ای، ایکسئین جی ڈی اے، ایکسئین ایجوکیشن، اسسٹنٹ کمشنر دنیور، اسسٹنٹ کمشنر جگلوٹ اور دیگر افسران نے شرکت کی۔ڈپٹی کمشنر گلگت نے خطاب کرتے ہوئے واضح کیا کہ ترقیاتی منصوبوں میں تاخیر کسی صورت برداشت نہیں کی جائے گی، اور تمام منصوبوں کو معیاری انداز میں اور تیزی سے مکمل کیا جائے۔ اجلاس کے دوران متعلقہ محکموں نے اپنے ترقیاتی منصوبوں اور زیر التواء اسکیموں پر تفصیلی بریفنگ دی۔ڈپٹی کمشنر نے ہدایت جاری کرتے ہوئے کہا کہ زمین کی سائیڈ سلیکشن، ٹھیکیداروں کی عدم دلچسپی یا دیگر مسائل کی نشاندہی کے لیے تفصیلی فہرست فوری طور پر فراہم کی جائے، تاکہ رکاوٹوں کو دور کر کے منصوبے جلد از جلد پایہ تکمیل تک پہنچ سکیں۔ ساتھ ہی تمام محکموں کو ہدایت دی گئی کہ گزشتہ چھ ماہ کی کارکردگی رپورٹ تیار کر کے پیش کریں۔
