بجلی بلوں کی ریکوری مہم کو مزید مؤثر بنانے کے لیے اقدامات جاری ہیں، محمد طلحہ اسد خان
ایڈمنسٹریٹر میونسپل کارپوریشن گلگت و اسسٹنٹ کمشنر محمد طلحہ اسد خان نے کہا ہے کہ بجلی بلوں کی ریکوری مہم کو مزید مؤثر بنانے کے لیے اقدامات جاری ہیں۔ ہفتہ کو یہاں جاری اپنے ایک بیان میں انہوں نے عوام سے اپیل کی کہ وہ ضلعی انتظامیہ کی ریکوری ٹیموں سے تعاون کریں کیونکہ بجلی استعمال کے بعد بلوں کی ادائیگی شرعی و قانونی فریضہ ہے۔انہوں نے کہا کہ محکمہ برقیات کے تعاون سے بل نادہندگان کے خلاف کارروائی کا آغاز کر دیا گیا ہے، غیر قانونی کنکشن استعمال کرنے والوں کے خلاف سخت قانونی ایکشن لیا جائے گا۔ انہوں نے شہریوں پر زور دیا کہ اپنے ذمہ واجب الادا بلز فوری طور پر ادا کریں تاکہ قانونی کارروائی سے بچا جا سکے۔ضلعی انتظامیہ نے محکمہ برقیات اور پولیس کے ہمراہ مشترکہ ٹیمیں تشکیل دی ہیں جو ہر سیکٹر میں گھر گھر جا کر آگاہی فراہم کریں گی، ان ٹیموں میں برقیات کا عملہ، مجسٹریٹس اور پولیس شامل ہو گی، جو نوٹسز جاری کریں گے اور بعد ازاں باقاعدہ ریکوری مہم کا آغاز کیا جائے گا۔
