وفاقی سطح پر اہم اجلاس، ڈیم متاثرین کے مسائل ترجیحی بنیادوں پر حل کرنے کے عزم کااظہار
وفاقی وزیر برائے امور کشمیر، گلگت بلتستان و سیفران انجینئر امیر مقام کی زیر صدارت گلگت بلتستان کے پانی کے منصوبوں پر اہم اجلاس منعقد ہوا،جس میں وفاقی وزیر برائے آبی وسائل معین وٹو، وزیر اعلی گلگت بلتستان حاجی گلبر خان، چیئرمین واپڈا لیفٹیننٹ جنرل (ر)سجاد غنی، سیکریٹری امور کشمیر، گلگت بلتستان و سیفران ظفر حسن، چیف سیکریٹری گلگت بلتستان ابرار احمد مرزا، ایڈیشنل سیکریٹری امور کشمیر، گلگت بلتستان و سیفران کامران الرحمان، اور جوائنٹ سیکریٹری گلگت بلتستان کونسل سدھیر خٹک نے شرکت کی۔اجلاس میں دیامر بھاشا ڈیم کے متاثرین کے مسائل کا خصوصی جائزہ لیا گیا،جس میں متفقہ طور وزیراعظم کے ویژن کے مطابق متاثرین کے تمام جائز مطالبات ترجیحی بنیادوں پر حل کرنے کے عزم کا اظہار کیا۔وفاقی وزیر انجینئر امیر مقام نے اس موقع پر کہا کہ گلگت بلتستان کی ترقی اور اس کے وسائل کو عوام کی بہتری کے لیے بروئے کار لانا حکومت کی اولین ترجیحات میں شامل ہے۔
