اسلام آباد : نوری آباد پاور پلانٹ مبینہ منی لانڈرنگ کیس میں وزیراعلیٰ سندھ مراد علی شاہ سمیت تمام ملزمان کو بری کردیا گیا۔
تفصیلات کے مطابق احتساب عدالت میں نوری آبادپاورپلانٹ منی لانڈرنگ کیس کی سماعت ہوئی ، احتساب عدالت کے جج ناصر جاوید رانا نے سماعت کی۔
ملزمان کے وکیل بیرسٹر قاسم نواز عباسی عدالت میں پیش ہوئے، چیئرمین نیب کی جانب سے ریفرنس واپس لینے کی درخواست دائر کی گئی۔
احتساب عدالت میں چیئرمین نیب کی ریفرنس واپس لینے کی درخواست منظور کرلی اور وزیراعلیٰ سندھ مراد علی شاہ سمیت تمام ملزمان کوبری کردیا۔
واضح رہے کہ نیب نے وزیراعلیٰ سندھ مراد علی شاہ کیخلاف ریفرنس دائر کیا تھا، نیب ریفرنس میں وزیراعلیٰ سندھ کے خلاف توانائی منصوبوں پر خلاف ضابطہ فنڈز جاری کرنے اور سندھ میں توانائی منصوبوں میں اختیارات کے غلط استعمال کا الزام عائد کیا گیا ہے۔
گذشتہ روز احتساب عدالت نے کڈنی ہل ریفرنس میں سلیم مانڈوی والا سمیت دیگر ملزمان کو بری کیا تھا،، 7ملزمان کیخلاف جنوری 2021 میں ریفرنس دائر کیا گیا تھا۔
