سابق چیئرمین سینیٹ صادق سنجرانی نے سربراہ بی این پی اختر مینگل سے رابطہ کیا۔ اس موقع پر اختر مینگل نے آئینی ترامیم کا مسودہ مانگ لیا۔
ذرائع کے مطابق صادق سنجرانی نے اختر مینگل کے مطالبات پر تبادلہ خیال کیا اور سربراہ بی این پی کے مطالبات پر بات چیت کی یقین دہانی کروائی۔
وفاقی دارالحکومت اسلام آباد میں چھٹی کے روز سیاسی ہلچل ہے۔ آئینی ترامیم کیلیے حکومت ایک طرف دو تہائی اکثریت حاصل کرنے کا دعویٰ کر رہی ہے تو دوسری جانب وفاقی کابینہ کے اجلاس کا وقت تبدیل کیا گیا اور اب اچانک مؤخر کر دیا گیا ہے۔ نائب وزیر اعظم اسحاق ڈار کا کہنا ہے کہ کابینہ اجلاس کچھ تاخیر کا شکار ہوا ہے۔
اسی طرح قومی اسمبلی کے اجلاس اور سینیٹ اجلاس کا وقت بھی تبدیل کیا گیا ہے۔ قومی اسمبلی کا اجلاس 4 بجے جبکہ سینیٹ اجلاس کا وقت 7 بجے رکھا گیا ہے۔
مجوزہ آئینی ترامیم پیش کرنے سے پہلے سیاسی سرگرمیاں عروج پر ہیں۔ حکومتی اور اپوزیشن جماعتیں مولانا فضل الرحمان کی حمایت حاصل کرنے کی پُرزور کوششیں کر رہی ہیں۔
اس سے پہلے اسپیکر قومی اسمبلی ایاز صادق کے چیمبر میں بھی آئینی ترامیم پر اہم مشاورتی اجلاس ہوئے۔ وزیر داخلہ محسن نقوی نے اعظم نذیر تارڑ اور اسحاق ڈار کو پارلیمانی کمیٹی کے اجلاس سے باہر بلا لیا اور اپنے چیمبر میں ان سے ملاقات کی۔
