پیپلزپارٹی کے رہنما نیئر بخاری نے کہا ہے کہ سیاسی لوگ گرفتاریوں سے گھبرایا نہیں کرتے۔
تفصیلات کے مطابق پیپلزپارٹی کے رہنما نیئر بخاری نے پروگرام باخبر سویرا میں کہا وزیراعلیٰ خیبر پختونخوا اپنی حدود سے تجاوز کررہے ہیں، پی ٹی آئی کی سیاست میں تسلسل نہیں ہے۔۔ ایک دن مؤقف کچھ دوسرے دن کچھ اور ہوجاتا ہے۔
انہوں نے کہا کہ پارلیمنٹ کے اپنے رولز ہیں جو بہت واضح ہیں، سیاسی لوگ گرفتاریوں سے گھبرایا نہیں کرتے، پیپلز پارٹی رولز آف لا پر یقین رکھتی ہے، پارلیمنٹ کا تقدس بحال کرنے کیلئے پی ٹی آئی رہنما بھی کردار ادا کرتے، جلسے میں جو زبان استعمال کی گئی وہ قوم سے چھپی نہیں ہے۔
نیئر بخاری کا کہنا تھا کہ پی ٹی آئی والے ایک دن ایک مؤقف رکھتے ہیں، دوسرے دن دوسرا ہوجاتا ہے، پی پی چیئرمین نے کہا ہے ملکی مسائل کے حل کیلئے مل کربیٹھیں، چارٹر آف پارلیمنٹ ابھی بنا نہیں ہے، پارلیمنٹ کے رولز میں امپلیمنٹ ہونا چاہیے۔
نیئر بخاری نے مزید کہا کہ گالم گلوچ کی قطعاً اجازت نہیں ہے، سینیٹ اجلاس میں ایک واقعہ ہوا تو ایک ممبر کو معطل کرنا پڑا، پارلیمنٹ میں جس طرح کی گفتگو کرتے ہیں یہ توہین پارلیمنٹ کے مرتکب ہوتے ہیں۔
